TATA IBADAH NATAL SEKSI WANITA GKPS 2018

TATA IBADAH

NATAL SEKSI WANITA GKPS

TAHUN 2018

TEMA:
Ibohali Manghobaskon Horja na Madear. (2 Timoteus 3:17)

SUB TEMA:
Bobai ma kuria in gabe paridop ni uhur songon Kristus paridop ni uhur in tarlobih hubani halak na musil, na marsitaronon  pakon na ibagas odoh-odoh

(Jeremia 29:7; Lukas 4:18-19).

A.  PERSIAPAN

1.    Pengkotbah, Panitia mengadakan persiapan kebaktian.

2.    Pahatahon Giring-giring/Lonceng Natal di bunyikan.

3.    Martonggo i  konsistori na binobanhon ni Parambilan.

B.  PROSESI + PAGARAHON LILIN (iiringi musik organ)

C.  KEBAKTIAN

Hatorangan:

Par. = Parambilan                           Nab.     = Naboru

P.L. = Pambobai Liturgi                   Gan.     = Haganup

Dal. = Dalahi                                   Kur.     = Kuria

1.      Praeludium

Mandoding : “Martumpu ma Hita” (Hai Mari Berhimpun)

Gan.     :  Martumpu ma hita malas ma uhurta,

               Laho ma hita hu Betlehem.

               Tonggor malekat mamuji Tuhanta,

               Sai sombah puji Ia, sai sombah puji Ia,

               Sai sombah puji Ia, Rajanta in.

            ......................... musik .......................

Nab.    : Tuhanta na sangap tubuh i dunia,

Dal.      : doskon songon hita jolma on.

Gan      :  Roh do Tuhanta, Sipaluah hita,

Dal.      :  Sai sombah puji Ia,

Nab.    :  sai sombah puji Ia,

Gan.     :  sai sombah puji Ia, Rajanta in.

2.      Votum – Introitus – Tonggo

(P.L : Mandodingkon)           

P.L.      :  Ibagas Goran ni Naibata Bapa, pakon Tuhan Jesus Kristus ampa Tonduy Napansing, Sitompa langit pakon tanoh on.

Kur.     :  Amen.

P.L.      :  Ari on do na jinadihon ni Jahowa. marolob-olob anjaha marmalas ni uhur ma hita halani ai.

Kur.     :  Puji Hita ma Tuhanta humbani ganup hosahta,

P.L.      :  humbani gok ni uhurta,

Gan.     :  ampa humbani gok ni gogohta.

Gan.     :  (mandodingkon)

               U............. Sai hupuji Ham O Tuhan,

               U............. Sai hupuji Ham O Kristus.

P.L.      :  Naibata totap do mangkaholongi hita. Lang anjai marnarotap holong ni ateiNi.

Kur.     :  Totap do iparmahani biribiriNi, tarlobih biribiriNi na magou, ipindahi  do,  biri biri na  ibagas hasosakan, janah ibagas naborit.

P.L.      :  Tarimakasih ma huBani, na totap mampardiateihon kuriaNi. Puji hita ma goranNi

Gan.     :  (mandodingkon)

               U............. Sai hupuji Ham O Tuhan,

               U............. Sai hupuji Ham O Kristus.

P.L.      :  Martonggo ma hita,

               “Ham Tuhan Naibata Bapanami na marhabangsa i nagori atas. Ipuji janah ipasangap hanami do Ham. Sirsir do Ham patoruhkon diriMu marhitei partubuh ni AnakMu Jesus Kristus ibagas hadoyukon, bani harang ni pinahan i Betlehem, ase gabe bayak hanami. Ajari Ham ma hanami marhitei TonduyMu Napansing in, ase lambin marbanggal hanami haganup ibagas panandaion bani holong ni ateiMu in, na padomuhon hanami huBamu, gabe jumpahan haluahon hanami. Idop ma uhurMu, ipadas hanami tonggonami on ibagas Jesus Kristus, Hata na dob gabe daging na marianan itongah tongah nami. Amen.

3.      Mandoding

“Sangap, Sangap bani Jesus Tuhankin” (S’lamat, S’lamat Datang)

Sangap, sangap bani Jesus Tuhankin,

Na roh do Ham hun surga hun rumahMu.

Sangap, sangap bani parrohMu hu tanoh on,

Gabe doskon jolma Tuhan parholong in,

sangap, sangap.

.................... musik .............................

Haganup parmahan jalo ma tongon,

barita malas uhur hun surga in.

Ai saborngin on do tubuh Tuhan Jesus in,

ai tibal do Ia bani palangka in,

sangap, sangap.

4.      Liturgi I : Pasal Hasangapon ni Naibata marhitei natinompaNi

5.      Mandoding

Tubuhon Poyon-poyon

Tubuhon poyon-poyon, i tongah juma in,

manggargar manuk-manuk, bai parasaranniin.

Marbagei pakon ihan, ibagas laut in,

ge tinompa na legan, seng targorani in.

Ganupan iparmudu, Tuhanta Naibata,

lobihan iparmudu, ganupan hita da.

Sonai ge halayakon, ibere do homa,

talup hatahononta, diatei tupa ma.

Ibere do panondang mataniari in,

bulan ampakon bintang panondang borngin in.

Udan logouni ari, pagantih soluk in,

sonin ma ganup tingki pajagar tanoh in.

Ganupan iparmudu Tuhanta Naibata,

lobihan iparmudu, ganupan hita da.

Sonai ‘ge halayakon ibere do homa,

talup hatahononta diatei tupa ma.

6.      Liturgi 2: Refleksi Pasal Hadousaon

7.      Mandoding

“Pamalas Uhurta”

Pamalas uhurta do partubuh ni.

Jesus Sipaluah haholongankin.

Jesus Sipaluah haholongankin.

            Ai buei do dousa parlajouan pe,

            Manunsahi hita ronsi matei bei,

            Manunsahi hita ronsi matei bei.

            Maparah tumang do hamagouan in,

            Anggo lang roh Jesus Sipaluah in,

            Anggo lang roh Jesus Sipaluah in.

8.      Liturgi 3: Refleksi Holong ni Naibata Bani Dunia on

9.      Mandoding

“Domma Jumpah Use Ari Pesta in”

Domma jumpah use ari pesta in partubuhon ni Tuhanta Jesus in;

Turun hape Ia roh hun surga in, roh manohu hujon.

Hasangapon bai Naibata, damei-damei bani jolma.

Megah uhur ni Naibata hajolmaon use.

Sombahnami hu Bamu na dob roh on, Ham siboan damei hu dunia on;

Sai pasorap Ham bai uhurnami on, dameiMu, o Jesus!

Hasangapon bai Naibata, damei-damei bani jolma.

Megah uhur ni Naibata hajolmaon use.

10.  Liturgi 4: Refleksi Partubuh ni Kristus

11.  Mandoding

“Sonang ni Borngin in” (Malam Kudus)

            Sonang ni bornginni in, sanggah roh Jesus in;

            Sonang modom do halak ganup,

dua mando na puho in rup.

Mangoromi AnakNi, Jesus Tuhanta in.

Dear ni bornginni in, sanggah roh Jesus in.

Bai parmahan i Betlehem in,

ipatugah na hun surga in;

Domma roh Sipagoluh, Jesus, Tuhanta in.

12.  Liturgi 5: Refleksi Natal

13.  Mandoding

“Humbai Pulou ge Banua” (Alam Raya Berkumandang)

Dal.      :  Humbai pulou ‘ge banua sai tarbogei do torus.

   Doding na mamuji Tuhan Sipanobus jolma in.

Gan.     :  Glo....o...o...o...o...ria, puji ma Tuhanta.

   Glo....o...o...o...o...ria, puji ma Tuhanta.

Nab.    :  Haganupan na i surga pasangapkon Naibata.

   Rap mandoding do sidea i lobei ni Naibata.

Gan.     :  Glo....o...o...o...o...ria, puji ma Tuhanta.

   Glo....o...o...o...o...ria, puji ma Tuhanta.

Gan.     :  Soridadu ni Tuhanta hormat bani Naibata.

               Haganup puji-pujian ondos bani Naibata.

               Glo....o...o...o...o...ria, puji ma Tuhanta.

   Glo....o...o...o...o...ria, puji ma Tuhanta.

14.  Renungan Natal

15.  Mandoding (irik patumpuhon galangan)

“Doding ni Malekat in” (Gita Sorga Bergema)

Doding ni malekat in, pasangapkon Tuhan in.

Na mambere hasonangan, Raja na dob tubuh in.

Haganupan bangsa-bangsa, sai mamuji bani Tuhan,

Jesus na hun surga in tubuh i Betlehem in,

Doding ni malekat in pasangapkon Tuhan in.

Ganup na i surga in, sai manombah Tuhan in.

Tuhan Jesus jadi jolma, roh bai hajolmaon in.

Lao mamboban haluahon, ganup dousa isalpuhon.

GoranNiin Immanuel, rapkon hita Tuhan in.

Doding ni malekat in, pasangapkon Tuhan in.

16.  Tonggo Galangan – Tonggo Panutup – Tonggo Riap – Pasu-pasu

        

Par.      :  Kuria ni Tuhanta, riap ma hita mangondoskon galanganta on hubani Tuhanta marhitei tonggo. Martonggo ma hita:

               Ham Tuhan Naibata Bapanami, diatei tupa ma Bamu na dob roh paluahkon hanami. Nuan Tuhan igalangkon hanami do hadirion nami, ampa hinadongannami, sai manumpaki ma ham Tuhan, ase lambin rarat hataMu i tongah-tongah ni kuria Mu i sab dunia on.  Sai pasada Ham ma Kuria mu i sab dunia on Tuhan

Kur.     :  Bere Ham ma dameiMu in, ase boi homa hanami mangidangi Ham marhitei pangidangionnami hubani haganup jolma, janah ase gabe pasu-pasu hanami on haganupan.

Par       :  Naibata ma haporusanMu arian pakon borngin. Tangi ma bai hata ni Tuhanta, ai martuah do hita anggo tanginan  bani hata ni Naibata anjaha mangkorjahon ai. Ulang ma hita targoda bai hajengeson ni dunia on ai hamagouan do ujungni tapi tapi tangi ma hita bani podah ni Tuhanta marhitei idop ni uhurNi. Ibagas Jesus Kristus, maluah ma hita. Riap ma hita martonggo marhitei tonggo na pinodahkon ni Tuhan Jesus hubanta

Kur.     :  Ham Bapa nami na i nagori atas ....... Amen.

Par.      :  Kuria ni Tuhan, jalo nasiam ma pasu-pasu humbani Tuhan:

               Ipasu-pasu anjaha iparorot Tuhan Naibata ma ham. Isondangkon Tuhan Naibata ma bohiNi hu bamu janah maidop ma uhurNi mangidah ham. Idompakkon Tuhan Naibata ma bohiNi hu bamu janah ipasorap ma dameiNi bani tonduymu. Amen.

Kur.     :  (mandodingkon) Amen. Amen. Amen.

17.  Postludium

Selamat Hari Natal 25-26 Desember 2018

&

Tahun Baru 01 Januari 2019

Liturgi Narasi Seksi Wanita

Liturgi I : Pasal Hasangapon ni Naibata marhitei natinompaNi

1.      Bani mulani lumei do tanoh on, lang adong pargoluhan, otik pe lang. Golap, haganupan do golap marimpot-impot. Lang adong mataniari laho manondangi tanoh on. Tapi sai marsinalsal do sondang na manongtong in i atas ni hajang-kajang in.

2.      Bibelta manaksihon paboa  mungkah ni haganup na adong aima  hata. Lang adong na legan sobali hata ai janah rap pakon hata ai do Jahowa Naibata. Hata ai aima Naibata, janah marianan ibagas Ia. Marhitei hata ai do itompa Naibata ma ganup na adong in.

3.      Tarpuji ma Tuhan Naibata na dob dong humbani na hinan ronsi sadokah ni dokahni. Na lang adong bonani anjaha lang dong ujungni. na markuasa ronsi sadokah ni dokahni.

4.      Dear do haganup. Bani mungkahni haganup na tinompa ni Naibata  dear do haganup. Ganupan na adong in marharohan humbani Naibata do anjaha tontu na madear do ganup na roh humBani.

5.      Damei do haganup. Bani mungkahni  lang adong hageoron ampa porang. Haganup do sirsir, dear janah ganup do mardalan bani dalanni bei songon sonaha sidea itompa. Naibata do na markuasa anjaha na mamarentah ganup na dong na ibagas damei in.

6.      Bani mungkahni itompa Naibata do tanoh on. Itompa do panondang ase margantih soluk arian pakon borngin, marganti ari, bulan, taun ampa musim. Sonai ma dear ganup mardalan anjaha taratur bei.

7.      Itompa Naibata do langit, laut, tanoh, suan-suanan, mataniari, bulan, bintang ampa binatang. Anggo mangkawah hita dompak langit na gijang ai, tubuh do ibagas pingkiran, aih dear, jenges, jagiahni in ganupan na tinompa ni Naibata.

8.      Sonin ma dear janah jengesni na tinompa in. Iondoskon Naibata do hubani jolma in tugas laho manramotkon ganupan na tinompa in. Hita do manjaga ganupan na adong i tanoh on janah manramotkon ase ulang maseda. Ase totap atur, banjei, dear, jenges ase lambin taridah pambahenan ni Tuhan na banggal in.

9.      Tonggor ma poltak do mataniari bai sogod ni ari. Ganup binatang na manjulur, sonai homa manuk-manuk marmogah-mogah do sidea bai sogod in. Namur matektek bai sogod ni ari. Jagiah ni in jadi jadian ni Naibata.

10.  Ampar do hajengeson in. Omei gorsing tokka ma sabion bahen panganon ni jolma. Sonai homa age bah mardalan, ija manggoluh buei tumang masam ni ikan ijai bahen panganon ni jolma. Hatahononta do diatei tupa pasal haganupan in

11.  Jumpah hita do totap ari na baru, bulan na baru, sonai age tahun margantih tahun. Ibotoh hita ma bahasa lambin magodang do haganup

umur ni jolma. Halani ai botoh hita ma tongtong  mamilangi ari-ari ni goluhta.

12.  Bah banggal pe sirsir do manjaliri sabah, mambahen jenges na sinuan, sonai homa age harangan na maratah. Alogou namarombus, borgoh tumang. Jorgit angkula. Sonin ma talup hatahononta diatei tupa bai haganupan tinompa ni Tuhan in.

Doding : Jengesni in ganup natinompa (Haleluya No.468)

Liturgi II  Refleksi Pasal Hadousaon

1.         Tuhan, Bapa nami ibagas Jesus Kristus, gati do hanami marondos huBamu. ase Ham na patorsahon goluhnami. HataMu ronsi aturanMu talup do dalankononnami.

2.         Tapi bani pargoluhannami siganup ari, gati do hanami manlembang humbani dalan-Mu in. Hisap-hisap ni dagingnami sandiri hotop do isuhuni hanami. Marsahap do Ham bai panggora ni uhurnami tapi gati do lang itangihon hanami. Dob ni goluhnami lang songon na isurahon Ham Tuhan.

3.         Bapa, sasap Ham ma dousa-dousanami. Sihol do uhurnami ase Ham ma na manompa janah pabayuhon hanami domu hubani harosuh ni uhur-Mu. Tapi Tuhan, mahol do sidalanonnami in. Gati do lang marhasabaron hanami. Borat do pangahapnami sipata laho mandalankon namadear halani bahatni tantangan. Ajari Ham ma hanami Tuhan, ase songon hata-Mu na mangkatahon: Martuah ma halak na manangar hata ni Naibata anjaha namarimbagashonsi.Dapotan malas ni uhur ma tongon hanami Tuhan. bani na mandalankon rosuh ni uhur-Mu.

4.         Songon panopa pisou, dob honsi itutung bosi ai, ipogpogi, dob ai itutung use, dob ai ipogpogi use ase boi gabe pisou sipakeion. Sonai ma bahen Ham hasabaronnami Tuhan mandompakhon goluh on ase hasabaronnami mambahen lambin roh dearni pargoluhannami. Ase  marguna janah maharga goluhnami i lobei-lobeiMu

5.         Bapa, tolong Ham ma hanami  ase anggo adong pe na koras paruhuran nami, roh hanami marondos hu Bamu Tuhan. Pabayu Ham ma uhurnami ase songon na hinarosuhkonMu pargoluhannami

6.         Ham Bapa,  bahen Ham ma hanami sipambalosi bani hataMu. Ungkab Ham ma uhur pakon pingkirannami age haporsayaonnami ase pitah mambalosi Ham hanami bani goluhnami.

7.         Ajari Ham ma hanami ase sirsir martoruh ni uhur huBamu janah  ra hanami marlajar,  manangihon ronsi mangkorjahon hataMu. Sirsir do hanami ipatupa janah ipauli Ham gabe tinompa na bayu.

Liturgi III Refleksi Holong ni Naibata Bani Dunia on

1.         Ham Tuhan anjaha Naibatanami,  Buei do sibere-bereMu bannami jolma manisia. tapi adong do sibere-bereMu na laingan anjaha sibanggalan hubannami. Ibere Ham do AnakMu na sasada in roh hu tongah-tongahnami halani holong-Mu hubani haganupan jolma pardousa.

2.         Ibere Ham do AnakMu Jesus Kristus na gabe Sipaluah bannami,

Ihatahon Ham do ase porsaya hanami hu-Bani AnakMu in, ase dapotan hagoluhan hanami, janah manggoluh hanami ibagas hagoluhan  na sasintongni songon na dob ipataridahkon  Jesus Kristus hubani haganup jolma.

3.         Tuhan, diatei tupa ma  bani sibere-bere Mu na banggal in. In ma sibere- bere na paluahkon hanami, janah  na mambahen lambin iarusi hanami pasal hagoluhan na sintong anjaha na totap.

4.         Ham Tuhan, Naibata na  daoh tumang do Ham hunan i nagori atas,

Na  mahol tumang jumpahan janah na lang  itanda hanami. Tapi nuan domma ipatandahon Ham diriMu marhitei Jesus Kristus Tuhannami.

Ia do na dob manobus hanami, na dob mabere goluh na bayu, sonai hata hagoluhan  na gabe sijolomonnami siganup ari

Tuhan tarimakasih ma Bamu Tuhan bani pambahenan-Mu na banggal in.

Liturgi  IV Refleksi Partubuh ni Kristus

1.      Ham Kristus Tuhan, Ham do na dob roh hu dunia on, Ham do na dob susur manopot hanami jolma pardousa on.

2.      Kristus, Tuhan, roh  do Ham humbani hasangapon-Mu. Roh Ham hu dunia on bani hadoyukonnami. Roh do Ham TUHAN manurdukkon tanganMu laho manogu hanami. Laho padameihon hanami pakon Naibata, padameihon hanami samah hanami jolma sonai tinompa.

3.                  Kristus, TUHAN roh do Ham manohu hanami ase roh hanami huBamu. Sanggah ibagas hagobiron, sitaronon, kekacauan, mangarap do ijia jolma in bani parrohni sipaluah. Bani situasi na sonai aima roh Naibata manohu jolma in ibagas Jesus Kristus. On ma na manontuhon pardalanan ni sejarah ni dunia on. Parroh ni Jesus aima mamboan Harajaon ni Naibata na ipaima-ima jolma bani panorang ijia.

4.                  Hatani Tuhan mangkatahon, Tonduy ni Tuhan in do sogop hu-Bangku, ai iminaki do Ahu, laho mangambilankon ambilan na madear bani halak na masombuh. Isuruh do Ahu laho patugahkon haluahon bani na tartutup ampa mambahen marpangidah use na mapitung, laho paluahkon halak na niodoh-odoh, ampa patugahkon tahun paridop ni uhuran ni Tuhan in (Lukas 4:18-19).

2.         Halani ai partubuh ni Tuhan Jesus mamboan sada situasi na baru, ija tanda-tanda Harajaon ni Naibata domma das hu tanoh on. Jesus roh mamboan haluahon, halak na masombuh, na tartutup, na mapitung, naniodoh-odoh sirsir do Ia mangkasomani. Hita do homa hasoman sahorja-Ni laho manorushon horja diakonia in.

3.         Natal aima ari hamonangan,Naibata na mangkasiholhon dunia on ibagas hasintongan, ibagas hadameion, ibagas kemakmuran. Sanggah goluh ni Jesus i tanoh on, ipataridahkon do harosuh ni Naibata  bani haganup horjaNi.

4.         Dihut ma homa hita pataridahkon tanda-tanda harajaon ni Naibata ai bani pargoluhanta. Marhitei parsahap, parlahouta, horjanta anjaha sihol ma haganupan in pataridahkon hasangapon ni Naibata.

5.         Ai hasoman sarhorja ni Naibata do hita, ihaporsayahon do hubanta marhorja bani pohon anggur-Ni. Patut do ihamalaskon hita kesempatan on laho pamalaskon uhur ni Naibata. Jesus mangkatahon: Martuah ma juak-juak, na mangkorjahon horjani ijumpahi tuanni bani parrohni.

6.         Tuhan Jesus patalarhon diriNi selaku parholong pakon panguhum na pintor. Sirsir do Ia manadingkon hasangaponNi gabe marrupa jolma laho manobus hita. Sirsir do Ia manjalo uhuman bani hayu parsilang mamorsan dousanta. Ase marhitei Tuhan Jesus domma ungkab haluahonta.

7.         Natal aima Naibata turun tangan hu dunia on, laho patorsahon dunia on na gok dousa. Haganupan in aima halani holong ni uhur ni Naibata bani dunia on, ase ulang magou ganup na porsaya Bani, tapi ase hagoluhan na sadokahni dokahni bani.

8.         Natal terjadi ibagas kesedarhanaan, malas ni uhur, damei, toruh ni uhur. On ma na menjiwai Perayaan Natal. Sonai do homa na patut sibahenonta bani na mamestahon Natal on na gabe hataridahanni panandaionta bani Tuhanta Jesus Kristus.

9.         Songon halak Majus ampa parmahan na pajumpah  pakon Jesus halani intei  sidea bani tanda-tanda na binere ni Naibata, sonai homa halani tangi  sidea bani Hata ni Naibata. Halani ai mararti ma Perayaan Natalta  anggo pajumpah hita pakon Tuhanta Jesus Kristus in. Tubuh ma Tuhan in ibagas paruhuranta.

Liturgi 5   : Refleksi Ari Natal

1.      Tuhan, sai ipindahi hanami do panondang in tapi hotop do hagolapan in monang bai hadirionnami. Sasap Ham ma dousa-dousanami

2.      Tuhan, dihut do hanami tarhinjat bani barita ni malekat in,  tapi ra do sipata pingkiran ge panlangkahnami bani na jahat. Sasap Ham ma dousa-dousanami.

3.      Iakui hanami do damei na binoban ni Natal, tapi gati do hanami lang mangindahi dalan hadameion na hunBamu. Sasap Ham ma dousa- dousanami.

4.      Tuhan, holong ma uhurMu bani hasomannami na talup namin dihut   riap pakon hanami marpesta Natal. Tapi halani naborit, mambahen maningon tibal nuan sidea i podoman. Bere Ham ma malas ni uhur ronsi hasabaron sonai ge hamalumon hubani sidea

5.      Tuhan bani ari Natal on mardingat do hanami bani hasomannami na hona musibah, i Donggala, palu pakon Sigi na  magouan keluarga, magouan bapa,magouan  inang sonai homa magouan niombah. Urupi Ham ma sidea, bere Ham ma pangarapan age apoh-apoh hubani sidea.

6.      Catatan : Refleksi bisa ditambahi sesuai dengan konteks setempat.